Vona að ég finni ekki nektarmynd af mér á netinu

Ég er fædd og uppalin á Ísafirði og hef farið skrilljón sinnum í þessa sundlaug.  En hef ekki orðið vör við þetta vandamál, kannski ekki fattað að maður sé að afklæða sig fyrir framan Pétur og Pál.  Og ég er svo heitfeng að ég stend iðulega alveg við gluggann og læt ferskt loftið leika um mig eftir sundið.

Í gamla daga var kvennaklefinn kvennaklefi og karlaklefinn karlaklefi.  Karlaklefinn var ívið stærri og þar var komið fyrir gufubaði.  Sem olli því að kellurnar risu upp á afturlappirnar og heimtuðu að fá líka gufubað.  Kvennaklefinn er hins vegar ca 20 fermetrar og ekki séns að koma fyrir gufubaði þar.  Svo núna er skipt reglulega, suma daga fer maður til hægri, aðra til vinstri.  Heyrst hefur af ákveðnum stjórnmálamönnum sem geta ekki hugsað sér að fara í sund á röngum dögum.  Og hættan á að vaða inn á gagnstætt kyn hefur aukist umtalsvert.

Humm, er þetta að verða ár hinna miklu játninga, ég var svolítið að prakkarast og kíkja inn í strákaklefann á unglingsárunum, og auðvitað voru strákarnir að opna dyrnar hjá okkur og kíkja inn.  En ég er búin að borga það til baka.  Ég ruglaðist þegar ég ætlaði á klósettið í búningsklefanum sem hýsti áður karlmenn eingöngu, stormaði fram og til baka í leit að klóinu og endaði berrössuð úti á laugarbakkanum við mikla lukku viðstaddra sundlaugargesta.

Óánægja meðal nemenda með baðaðstöðu

Athugasemdir

[Jón Steinar Ragnarsson, 18.1.2010 kl. 12:42]

Sæl Hrönn. Gaman að sjá þig hér. Ég held að þetta sé eitthvað, sem hefur verið staðreynd í 40 ár eða lengur og botna ekki í af hverju að þetta er fráttamatur. 

Ég skrifaði einu sinni frásögn hér á bloggið, þar sem þetta er nefnt og því lýst hvernig þetta horfir til. Við púkarnir lágum með bakið upp við sundlaugarvegginn á kvöldin og horfðum upp undir opna glugga (litla) sem spegluðu því sem markvert var að okkar mati í kvennaklefanum. Óttalega saklaust.

Hér er frásögnin, ef þú hefur ekki séð hana.

[Jens Guð, 18.1.2010 kl. 13:38]

[Hjóla-Hrönn, 18.1.2010 kl. 18:05]

Jón Steinar, þú ert agalegur, nú arga Ísfirskar stelpur/konur á öllum aldri í einum kór eftir þessar upplýsingar, ekki hafði ég hugmynd um þessa gægjuleið

[Jens Guð, 20.1.2010 kl. 23:57]

Hjóla-Hrönn,  þú ert alltaf skemmtileg!