Berrössuð um bæinn

Á síðasta ári fjölmennti hjólreiðafólk og hjólaði saman á götum borgarinnar til að vekja athygli á aðstöðuleysi þeirra sem velja reiðhjól sem samgöngutæki.  Þetta var viðburðurinn Berbakt um Bæinn, fólk fækkaði fötum og skrifaði slagorð á bakið.  Sumir voru kappklæddir, aðrir naktir niður að mitti, sumir berleggjaðir og aðrir með bara bakið bert.  Ég var lasin í fyrra, ennþá að jafna mig eftir svínaflensu og ákvað að vera kappklædd, en náði samt að tækla hugtakið nokkuð vel.  Þ.e. ég var með bakið bert og áritað.



Í ár verður aftur hjólað um götur borgarinnar á Menningarnótt.  Lagt af stað frá Klambratúni (áður Miklatún) kl 15:00.  Að þessu sinni ætla ég að gera eitthvað öðru vísi, mun pottþétt verða fáklæddari ef ég verð ekki kvefuð eða með flensu, en er samt ekki alveg viss hvernig ég ætla að hafa þetta.  Best er að reyna að finna eitthvað í klæðaskápnum, þar á ég t.d. forláta hjólabuxur sem ég keypti á netinu, sem eru afskaplega skrítnar í sniðinu.  Þær eru háar upp í mittið að aftan, en ná varla upp fyrir hárlínu að framan.    Einhvers konar Racer-dæmi svo konur líti vel út í áltútri stöðu á reiðhjóli.  Það bara gleymdist að gera ráð fyrir því að konur þurfi að stíga af baki eftir hjólatúrinn án þess að vera með búrku meðferðis til að skýla sér.  Ég fer ekki út úr svefnhverberginu í þessum hjólabuxum, þær flokkast undir dónó stuff & dót á þessum bæ.  Ef ég fer í þær öfugar, þ.e. læt botnstykkið styðja við konumagann og hef framhliðina aftur, þá breytist viðburðurinn í "Berrössuð um bæinn".  Spurning hvort ég næði að hjóla viðburðinn á enda áður en löggan mætir og handtekur strípalinginn...

Hvet fólk til að fjölmenna og hjóla saman, þeir sem vilja geta fengið útrás fyrir strípihneigðina, hinir geta mætt í föðurlandinu...

Athugasemdir

[Heimir H. Karlsson (IP-tala skráð) 13.9.2010 kl. 13:10]

Sæl Öllsömul.

Sæl Hrönn.

Hægt að klæðast ýmsu, eða jafnvel engu við hjólreiðar.

Er veðurfarstengt, hverju maður klæðist.  Þægindi og álit annara er næst í röðinni.

Ég velti því fyrir mér, þegar ég bjó í næsta nágrenni við verksmiðju sem framleiddi teflonhúðuð eldhúsáhöld, hvenær það yrði tæknilegur möguleiki að láta græða á sig teflonhúð. Ég þyrfti aldrei framar að hafa áhyggjur af sunnlensku sumri, eða rigningu yfirleitt.

Ég hef einu sinni hugsað um að hjóla nakinn, fyrst og fremst til eigin þæginda í það skiptið.

Var á ferð upp gamla Vaðlaheiðaveginn austanmeginn í besta norðlensku sumri fyrir 15 árum síðan. Algert logn og glampandi sól.

Fór úr öllu nema sokkum, skóm og hjólastuttbuxunum. Ætlaði að fara úr hjólabuxunum líka, það var bara svo heitt. Sem betur fer gerði ég það ekki, því ég mætti lítilli rútu á þessum lokaða vegi, fullri af ferðafólki.

Ég man eftir hvítum bolum í í húsnæði Fjallahjólaklúbbsins með áprentaðri mynd af tveimur nöktum karlmönnum, meðlimum klúbbsins, á hjóli úti í sunnlenskri náttúru. Með textanum: "Njóttu frelsis á reiðhjóli"

Hvað um það, ég á þá a.m.k.  eftir að prufa eitthvað á reiðhjólinu.

Bæti því í safn yfir leiðir sem á eftir að hjóla.

Kveðja,

Heimir H. Karlsson.