Ein ég sit við sauma

Ég lærði að sauma 5 ára gömul, bjó til ballkjól á Barbí úr vasaklút pabba.  Hvort hann var hrifinn af uppátækinu veit ég ekki, en Barbí var svo sannarlega glæsileg í múnderingunni.  Á því miður ekki mynd, í þá daga var ekki bruðlað með filmur á svo hversdagslegt efni.

Ég saumaði þetta korselett upp úr venjulegu öryggisvesti.  Svona flíkur er ekki hægt að fjöldaframleiða, það þarf að máta það á röngunni og nota ógrynni af títuprjónum til að fá flíkina til að passa.  Og ókosturinn er að það má hvorki þyngjast né léttast, þá passar það ekki lengur.  Frétti að vændiskonur á Spáni voru neyddar til að ganga í öryggisvestum ef þær ætluðu að selja blíðu sína í vegarkantinum, eins gott að vera ekki í þessu vesti þar í hjólaferð, það gæti valdið misskilningi.

Athugasemdir

[Jóhann Elíasson, 26.10.2017 kl. 15:34]

Það var virkilega leiðinlegt að heyra að helvítis slitgigtin skuli hafa farið svona illa með þig.  Vonandi jafnar þú þig vel af þessu í vetur, annars er ég með þennan fjanda og hefur reynst mér ágætlega að taka "sæbjúgnahylki" og núna síðustu tvo mánuði hef ég líka tekið selaolíu sem er bara á góðri Íslensku selalýsi.  Ég hef ekki ennþá fundið fyrir mun á gigtinni en húðin hefur skánað mikið (ég var með þurra og frekar leiðinlega húð og bara vegna þess ætla ég að halda áfram að taka þetta).

[Sigurður Kristján Hjaltested, 27.10.2017 kl. 00:08]

Flott korsilett. Þú ættir að fá einkaleyfi á þessu..:) 

Gangi þér vel og náðu góðum bata.

[Ómar Ragnarsson, 27.10.2017 kl. 01:19]

Ég er með ónýt hné, það vinstra komið bein í bein og við myndatöku vegna umferðarslyss sagði læknirinn að ég þyrfti ekki annað en að lyfta símtóli til þess að fá settan hnjálið í vinstra megin. 

En fyrir hreina tilviljun var ég svo heppinn fyrir rúmum tveimur árum að áskotnast rafreiðhjól sem er getur bæði verið með rafknúnu hjálparátaki en einnig með handgjöf. 

Hnén skánuðu eftir eð ég gat valið um það hve mikið ég reyndi á þau á þessu frábæra hjóli.